རྒྱུན་ཤེས།
མཐུན་པ་སྤུན་བཞི།
གནའ་སྔ་མོ་དྲང་སྲོང་ལྷུང་བ་ཞེས་བྱ་བའི་གྲོང་ཁྱེར་ཆེན་པོ་ཞིག་ན།
རྒྱལ་པོ་ཚངས་བྱིན་ཞེས་བྱ་བ་ཞིག་ཡོད།
ལྗོངས་དེའི་ཤར་ལྷོའི་མཚམས་ན་ལྗོན་ཤིང་གཡུ་ལོ་ཐོགས་སུ་བཀྲ་བའི་ཚང་ཚིང་མེ་ཏོག་སྣ་ཚོགས་སྡུག་གུར་བཞད་པའི་གསེབ་ན།
རྩྭ་སྤྱིལ་བུ་ཟླུམ་པོ་གདུགས་ལྟ་བུ་ཞིག་ཡོད།
དེ་ན་རྣམ་པ་ཀུན་ཏུ་ལེགས་ཉེས་ལ་རྟོག་པའི་དྲང་སྲོང་ཞིག་གནས།
ལྗོངས་འདིའི་དབུས་ན་ཤིང་ནྱ་གྲོ་རྡའི་ལྗོན་པ་ཚད་དུ་རྫོགས་པ་ཞིག་ཡོད།
སྲོག་ཆགས་གོང་མ་སྲེད་དང་། རི་བོང་། སྤྲེའུ།
གླང་ཆེན་བཅས་གནས་ཡོད། དེ་རྣམས་ཕན་ཚུན་ཡིད་གཅུགས་ཤིང་བདེ་སྐྱིད་ཀྱི་འཚོ་བ་ལ་ལོངས་སུ་སྤྱོད་པའི་སྐབས་དེར།
སྲོག་ཆགས་བཞི་པོས་རང་ཅག་བདེ་ཞིང་སྐྱིད་པ་འདིའི་ཐོག་ང་ཚོས་རྒན་རབས་ལ་བཀུར་བ་དང་།
གཅིག་ཕན་གཅིག་གྲོགས་འཇིག་རྟེན་གྱི་མིག་དཔེར་འོས་པ་ཞིག་ཡོང་ཐུབ་པ་ལ་འབད་རྒྱུའི་བཟང་པོའི་གྲོས་ལ་ཞུགས་ཏེ་མཐར་སུ་རྒན་པ་དང་།
སུ་གཞོན་པའི་གནས་ཚུལ་བརྟག་དཔྱད་བྱ་རྒྱུར་མོས་མཐུན་བྱུང་། ཐོག་མར་བྱ་གོང་མ་སྲེག་གིས་ནྱ་གྲོ་རྡའི་ཤིང་སྡོང་ཞིག་བསྟན་པར། གླང་ཆེན་གྱིས་བདག་དང་པོ་ལམ་འདི་བརྒྱུད་ནས་འགྲོ་སྐབས་ཤིང་འདི་བདག་གི་ལུས་ཚད་དང་མཉམ་པ་ཞིག་མཐོང་བྱུང་ཞེས་བཤད།
དེ་ནས་སྤྲེའུས་བདག་གནས་འདིར་སླེབས་སྐབས་ཀྱང་ཤིང་འདིའི་རིང་ཚད་བདག་གི་ལུས་དང་མཉམ་པ་འདུག་ཅེས་བཤད།
དེ་ནས་རི་བོང་གིས་བདག་འདིར་སླེབས་སྐབས་ཤིང་འདི་སྐྱེས་ནས་ལོ་མ་གཉིས་ཙམ་ཡོད་པའི་སྟེང་གི་ཟིལ་པ་བལྡགས་པ་ཡིན་ཞེས་སྨྲས།
མཐར་བྱ་གོང་མ་སྲེག་གིས་བདག་གིས་འདིའི་ས་བོན་བཟས་ནས་སྟུག་པ་བཏང་བ་ལས་ཤིང་འདི་སྐྱེས་པ་རེད་ཅེས་བཤད།
སྲོག་ཆགས་བཞི་པོས་རང་གནས་འདིར་ཐོག་མ་སླེབས་ཀྱི་གནས་ཚུལ་གསོང་པོར་སྨྲས་པས། དེ་རྣམས་ཀྱི་རྒན་གཞོན་གྱི་གོ་རིམ་བྱུང་བ་དེས་སྔར་བས་ཕན་ཚུན་མཛའ་གཅུགས་དང་ཞེ་སར་བཅས་པའི་རྒན་གཞོན་བཀུར་བསྟི་དང་།
ཐ་ན་ཕར་ཚུར་འགྲོ་སྐབས་ཀྱང་གླང་པོ་ཆེ་ལ་སྤྲེའུ་དང་།དེ་ལ་རི་བོང་།
རི་བོང་ལ་བྱ་གོང་མ་སྲེག་བཞོན་ནས་འགྲོ་བས་ཡུལ་དེའི་མི་རྣམས་སྲོག་ཆགས་བཞི་པོ་དེའི་ལེགས་བྱས་ཀྱི་དཔལ་ལ་ཡི་རང་ཞིང་དེ་ལྟར་སྤྱོད་པས་ས་ཀུན་ཏུ་ཆར་ཆུ་དུས་སུ་འབེབ་པ་དང་།
ལོ་ཕྱུགས་རྟག་ཏུ་ལེགས་པ་སོགས་བཀྲ་ཤིས་དགེ་མཚན་གྱིས་ཁྱབ་པ་བྱུང་།
ལྷའི་དབང་པོ་བརྒྱ་བྱིན་ཡང་ཡིད་རབ་ཏུ་འཕྲོག་སྟེ།
གུས་བཀུར་ཞེ་ས་དང་བཅས་པར། དཀའ་ཐུབ་ཚལ་ན་གནས་པ་ཡི། །གོང་མ་སྲེག་གིས་ཚངས་སྤྱོད་དག །འཇིག་རྟེན་སོ་སོར་རབ་ཏུ་བསྟན། །
Comments
Post a Comment